Video: Kobus Galloway gesels oor Where’s Zuma? en hoe skerpskerts sy selfvertroue opgebou het

by Amanda on Dec 8th, 2015

Kobus Galloway was onlangs ‘n gas op kykNET se aktualiteitsprogram Flits waar hy met Bouwer Bosch gesels het oor sy Idees vol vrees-reeks en sy nuwe boek, Where’s Zuma?

Met die intrapslag is Galloway reeds op sy stukke. Bosch: “Welkom Kobus, lekker om jou op die show te hê … huge fan, ou.” Galloway: “Jy hét ‘n bietjie gewig opgetel.”

Galloway vertel dat die kunsgogga hom al op vyfjarige ouderdom gebyt het en die komedie het kort daarna gevolg. Sy ouers het hom as kind na ‘n kunsskool in Bredasdorp gestuur, en toe sy juffrou sy katte aangesien het vir leeus was die koeël deur die kerk.

Oor sy jongste boek Where’s Zuma?, wat gegrond is op die gewilde Where’s Wally-reeks deur Martin Handford, vertel Galloway: “As jy die president klaar gekry het dan’s daar ‘n lysie van ander mense wat jy kan soek. As jy hou van Afrikaanse musiek kan vir jy Steve Hofmeyr gaan soek.” Ander versteekte bekendes sluit in Die Antwoord, Jack Parow en Oscar Pistorius.

Oor sy loopbaan as komediant vertel die komediant-kunstenaar dat hy vanaf 2009 vir drie jaar “geskerpskerts” het: “Ek het altyd ‘n probleem gehad om met mense te praat of as my foon lui wil ek my broek natmaak, so ek het dit gebruik om self-confidence op te bou en met mense te praat.”

Galloway gesels meer oor sy kreatiewe proses, hoe hy kritiek hanteer en hoe hy voel oor mense wat plagiaat pleeg. Hy vertel ook dat hy baie daarvan hou wanneer onderwysers sy spotprente in klaskamers gebruik om idiome te verduidelik.

Kyk na die video: